دونیانین بیر چوخ اؤلکه سینده اولدوغو کیمی ، بیزیم اؤلکه ده ده قادین حاقلاری آیاقلانماقدادیر و قادین لار توپلومدا لاییقی یئرلرین تاپماییبلار.گونئی آذربایجان دا ایللردیر میللی آزادلیق حرکاتی باش توتوب سورمکده دیر و میللتیمیزین میللی حاقلارینین پوزولماسیندان سوز گئدیر. تاسف لر اولسون کی میللتیمیز و حتی میللتچیلریمیز ، قادین لارین مضاعف معروض قالدیقلاری آیری سئچگیلییی گؤرمزدن گلیرلر. حتی بیر سیرا میللی حرکت فعاللاری و قادین حاقلاری چالیشقانلارینین بیلمه دن و یا مسئولیت داشیمادان گؤردوکلری ایشلر و دئدیکلری سؤزلر ، آذربایجان قادین حرکاتی نی آذربایجان میللی حرکتیندن فرقلی و حتی بیر بیرینه قارشی اولدوغو کیمی گؤستریر.
سیرالایاجاغیمیز نوکته لره اساساً بو ایکی حرکتی بیر بیریندن آییرماق ، بو حرکتلرین ضعیفلنمه سینه سبب اولور.
· آذربایجان میللتینه گئدن میللی حاقسیزلیق، قادین لارین معروض قالدیقلاری جنسی ظولمون اؤنملی ندنلریندندیر
· قادین لارا گئدن حاقسیزلیق لار و قادین لارین ایستک لری ، اونلارین دوروملاری، زامان، مکان، کولتور، ملیت و … دن آسیلی اولاراق، توپلوم دان توپلوما فرقلی دیر. او اوزدن آذربایجان قادین حرکاتی و ایران دا گئدن قادین حرکاتی ، بیر چوخ اورتاقلیقلاری و لازیمی امکداشلیقلاری اولابیلدیینه راغماً هر بیرینین اؤزلرینه عایید اؤزللیکلری وار و بیر بیریندن موستقیل اولاراق چالیشمالی دیرلار.
· یاری حیصه سی قادین لاردان اولوشان بیر میللتین ، میللی سعادتی ، قادین لارین حاقلارینی نظرده آلمادان سؤزقونوسو اولابیلمز. باشقا طرف دن قادین لارین اؤنملی رولو میللی حرکتین گلیشمه سی و ایرلی لمه سینده دانیلمازدیر.
· آذربایجان میللی تاریخ، کولتور و ایجتماعی دورومونو ، بؤلگه ده اولان باشقا میللت لرله توتوشدورماقدا، آذربایجانین، قادین حاقلارینی دیرلندیرمکده یاخشی پتانسیل لره صاحیب اولدوغونو گؤره بیله ریک.
· دونیادا گئدن کؤلتورل، سیاسال و میللی حرکت لردن الده اولان تجروبه لره اساساً هر هانسی بیر حرکتی(میللی حرکت) ارجح بیلیب، باشقا حرکت لرین(قادین حرکاتی) ایستک لرین اؤنمسه مه ییب ، بیر حرکتین اوغور قازانماسین باشقا حرکتین اوغورقازانماسیندان آسیلی ساخلاماق، سیناودان چیخماییب.
آذربایجان قادین حرکاتی و آذربایجان میلی حرکتینین آیریلماز اولدوقلارینا اینانیب، هرهانسینین اوغورسوزلوغونو باشقاسینین اوغورسوزلوغو آنلامیندا سانیریق. بئله لیکله آذربایجان اؤیرنجی حرکاتی نین قادین قولو اولاراق رسمی چالیشمالاریمیزین باشلانیشینی ، رسمی تریبونوموز اولان www.qadinchi.blogfa.com وئبلاگینین آچیلیشیلا اعلان ائدیریک و اونملی هدف لریمیز وپیلانلاریمیزی سیرالاییریق:
۱. آذربایجان قادینین اؤز دورومو و حاقلاریلا تانیشدیرماق.
۲. قاندینلارین معروض قالدیغی آیری سئچگیلیی دایاندیرماق
۳. توپلومدا گئدن ارکک اوستونلوک کولتورونو آرادان قالدیریب ، ارکک و قادین برابرلییی یاراتماق.
۴. قادین حاقلارینی میللی حرکتین اؤنملی هدف لریندن بیریسینه چئویرمک.
۵. آذربایجان میللی حرکتینین ماهییتی و هدف لرینی و قادین لارین بو حرکت ده اولان روللارینی توپلومون قادینلارینا تانیتدیریب، آچیقلاماق.
۶. .آذربایجان ضیالی قادینیلارینی، ایران قادینی و آذربایجان قادینین دوملاریندا اولان آیریمتیلارلا تانیش ائله مک.
۷. قادینلارین چالیشمالارینا زمینه یارادیب، اونلارین سیاسی- اجتماعی حرکت لرده ، اؤزللیکله میللی حرکت ده روللارین آرتماق.
۸. قادینلارا میللی حرکت ایچره یؤنتمنلیک ائدیب، پروفشنال چالیشماق اوچون، اؤیرتیم وئرمک.
۹. ….
اوموروق میللی حرکت و قادین حرکاتی چالیشقانلارینین فیکیرداشلیقلاری و یاردیم لاری ایله آذربایجان میللتینین سعادتی اوغروندا کیچیک بیر آددیم گؤتورموش اولاق.
آذربایج اآذربایجان اؤیرنجی حرکاتی قادین قولون قادین و
۸۶/۱۰/۱۳
www.qadinchi.blogfa.com
mail:qadinchi@gmail.com
qadinchi@yahoo.com