۱۹۴۵نجی ایلده گونئی آذربایجان میللی حوکومتی قورولاندا بیرینجی دفعه اولاراق قادینلاریمیز کیشیلرله برابر حوقوقا صاحیب اولموشلار و بویوک مقاملارا ال چاتیب، سیاسی موباریزه ده اؤز تشکیلاتلاری ایله ایشتیراک ائتمیشلر. تأسفله خاریجی اؤلکه لرین یاردیمی و فارس فاشیزمی نین هوجومی ایله آذربایجان میللی حوکومتی بیر ایلدن آرتیق دوام گتیرمدی و الده ائدیلن بوتون میللی نائلییتلر آرادان قالدیریلدی. پهلوی رژیمی نین حاکیمییتی ایللرینده آذربایجان تورک قادینی داها دا اؤز سوسیال یئرینی ایتیردی.
فاشیست اسلام رژیمی نین قورولماسی ایله قادین حقلری داها آرتیق آرادان آپاریلدی. بیر سیرا اورتا عصرین ارتجاعی قانونلاری قادینلارین یاشامینا کؤلگه سالدی. آنجاق بونا باخمایاراق گونئی آذربایجان تورک قادینی آیاقدان دوشمه ییب، حبسدن و اؤلومدن قورخماییر و بوگونکی اؤزگورلوک موباریزه سینده شیرکت ائدیر.
مرکزی پان ایرانیست رژیمی نین طرفیندن میللی ظولمه معروض قالان قادینلارین عینی زماندا پاتریالکال ظولملردن ده قورتولولمالاری گرکیر.
گنل اولاراق ایران اسلام جومهورییتینین آنا یاساسی آچیقجاسینا جینسی آپارتایدا رسمیت وقانونیت وئریب دیر. جینسى آپارتاید و قادینلارین تحقیرائدیلمه سى ایران اسلام جومهورییتی نین دونیا گؤروشونون تملی دیر. بونونلا بیرلیکده تورک وآذربایجانلی قادینلار ملی هویتلرینه گؤره ایکی قات داها ظولمه و شیددته معروض قالیب و توپلومدا دؤردونجو درجه وطنداش حساب اولورلار.
آمستردام دیالوق توپلانتیسی آشاغیداکی پرنسیب لره دایانماقدادیر:
– قادینلارین علئیهینه اولان بوتون یازی لی و شفاهی قانونلارین قالدیریلماسی گرکیر. بو قانونلار توپلومون بوتون ساحه لرینده اؤز عکسلرینی تاپمالیلار.
-قادین کیشی برابرلیغی توپلومون بوتون ساحه لرینده قانونی لشمه لیدیر .
-آذربایجان تورک قادینلاری اؤزمستقیل تشکیلاتلارینی قورماق حقینه مالیک اولمالی لار.
-آذربایجان تورک قادینلارینین توپلومون بوتون ساحه لرینده آکتیو و قراروئریجی بیر شکیلده قاتیلمالاری دستکلنمه لی دیر.
– آذربایجان تورک قادینلارینین اؤز میللی کیملیکلرینی قورویاراق یورد ایچی و یورد دیشی تشکیلاتلارلا ایش بیرلییی ائتمه لری دستکلنمه لی دیر.
– یورد ایچینده و اولوسلارآراسی ساحه ده آذربایجانلی تورک اجتماعی- سیاسی فعال، صنعتچی ، یازار ……قادینلار تانیتیلمالی و اونلارین معروض قالدیغی ائشیتسیزلیکلر افشا اولونمالی دیر.
یاشاسین آذربایجان
یاشاسین آذربایجان تورک قادینلاری
آمستردام
۲۱ آذر ۱۳۸۸/ ۱۲ دکابر۲۰۰۹