بوگون ۲۷ ایل چالخانتیلی تجربه لردن سورا، ایران قادین حقلری حرکتی، اولوسلارآراسی آنلاشمالارا مراجعه ائدرک، “برابرلیک” شعارینی اورتویا سورمک و بوتون سئچگینلیک قویان قانونلاری آرادان قالدیرماغینین گرک اولدوغونو اعلام ائتمک اوچون، طالع تعیین ائدیجی بیر مئیدانا آددیم باسمیشدیر. بو باخیمنان، قاباقجیل(پیشرو) قادینلارین، کولتورئل مرکزلری قورما، قوروپسال فعالیتلر و دؤنه لی(متعدد) اعتراضلاری، او جمله دن؛ “بیر میلیون امضا” کامپانیاسی و “داشالاما علیهنه” مبارزه لری، سون درجه اومید وئریجی چالیشمالاردان دیرلار. سؤز سوز، بو دارتیشمالارین اورتایا سورولمه سی و بو اجتماعی فعالیتلرین ایره لی آپاریلماسی، “برابرلیک” و “آزادلیق” ایستکلرینین بیر بیرینه دویونلنمه سینه چئوریله جک. جسارتله دئمک اولارکی، بو گونکو ایراندا، قادینلار حرکتی باشقا آزادلیق سئور اجتماعی حرکتلرله بیرگه و چییین چیینه، دئموکراسی اوچون مبارزه نین آنا نقطه سینده دورور.
آزادلیقدان دفاع ائتمک اوچون قادینلار حرکتی، مختلف اینانجلی قادین و کیشیلری بیر آرایا گتیررک، بیر کولتورئل – اجتماعی مبارزه میدانی یارادیپ، زوراکیلیغین بوتون عرصه لرینی سورغویا چکیر. جنسیتلر آراسی ایلیشگیلر، بوتون عرصه لری چئویرن توپلومسال، کولتورئل و سیاسی بیر قونو دور، ائله بو اوزدن، قادین حقلریندن دفاع ائتمک یولوندا مبارزه امکداشلیغی، توپلومون تک – تکینی، بوتون شخصی، توپلومسال و سیاسی مسئله لرینی یئنی دن گؤزدن گئچیرمه یه چاغیریر. بو گون ایراندا، “بد حجابی – (حجاب پوزغونلوغو)”، حکومت قووه لرینین، اسلامچی نظامین اولگولرینه “یوخ ” دیین قادینلارا گوندلیک تعرض ائتمه باهاناسینا چئوریلیبدیر. بئله بیرحالدا و بو تعرضلرین واسطه سینن، حاکمیت، اؤز باسقین گتیرن گوجلرینین، توپلومدا اولدوغونو مشروعلاشدیریپ و قورخو یارادیر. قوللوق نشانی اولان قادین “حجاب” ینین زوروملولوغو، باسقین گتیرن گوجلرین، بوتون ساحه لرده گئنیشلنمه سینه سبب اولوب.
گرچگ بو دورکی، قادینلارین دورومو، توپلومون اؤنونده دوران، غالب گوجلرین واقعی اوزونو گورستمکده، بیر گئنیش گؤزگو(آینه) دور، و فئمنیستی دوشونجه، جنسیتلر آراسینداکی قاریشیق ایلیشکیلری آیدینلاتماقلا، توپلومسال یاشاییشین چئشیدلی سطحلرینده اولان قدرت ایلیشکیلرینی گؤستریر. فئمینیستی دوشونجه سینی و فعالیتلرینی بیر حزب و یا سیاسی سازمانین چرچیوه سینده سیغیشدیرماق اولماز و عین حالدا دانماق اولماز کی، سیاسی و قوروپسال منفعتلرله ده، قارشی قارشییا دورا بیلیر، و بونا دقت ائتمه، قادین حرکتینن دفاع ادعاسی اولانلارین سؤز و عمللرینه گؤره توتولان موضعلرده حیاتی اؤنم داشیر. سؤزسوز، قاباقجیل قادینلارین ایراندا باشلاتیغی بو مبارزه ده، بئله بیر ادعالار دا سیناقدان گئچیر و شکسیز دئمک اولار کی، فردلرین و قوروپلارین، قادینلار آزادلیق و برابرلیینه گؤره توتدوقلاری موضعلری، اونلارین آزادلیق و برابرلیک و توپلومسال عدالت ایستمه لرینین نه قدر دواملی اولدوغو درجه سین گؤرسه دجک.
بئله بیر آغیر دورومدا، بیز، اؤلکه دیشیندا ایللرجه قادینلارین دوروملارینین یوکسلیشی اوچون مبارزه ائدن قادینلارین بیر توپلومو، بئله بیر قراره گلدیک کی، اؤز دوشونجه لریمیزین استقلالین قورویاراق، قادینلار حرکتینین برابرلیک سئور آماجلارینا داها تأثیرلی آرخا دورماق اوچون بیرگه آددیملار گؤتورک. بیز بو ایللر سورسینده، چئشیدلی فیکیرلر و فرقلی نظری و سیاسی باخیشلاریمیزا رغمن، “اسلامی فئمینسمه”، یوخ دییرَک، قادینلارین برابرلیک حاقلارینی و آزادلیقلارینی آلماق اوچون مستقل مبارزه لرینین گرک اولدوغوندان سؤز آچیب و اونون اوچون چالیشمیشیق.
بیزیم بو گونکو بیرلیکیمیز، آشاغیدا کی حداقللر اوزره اولوب و دوام تاپاجاق:
۱. انسان حاقلاری و قادینلار آزادلیغینین ضامینی اولان، بین الخالق آنلاشمالارا مراجعه ائدرک، “برابرلیک” ایسته گی اساسیندا بوتون جنسی سئچگینلیکلری آرادان قالدیرماق اوچون قادینلارین گؤتوردوکلری آددیملاردان حمایت ائتمک ضرورتینین آنلاییشی.
۲. قادینلارین آزادلیق و برابرلیک ایستکلرینین هئچ بیر یوروم و یوزوملا، او جمله دن ائتنیکی، مذهبی و ملی هویتلری گؤزلمکله، محدود اولا بییلمییجیینه، و بونا باخاراق، “اسلامی فئمنیسم” و “اسلامی انسان حقوقلاری” نین آزادلیق و برابرلییه چاتمییاجاغینا، بیرلیکده اینانیش. حال بو کی، اولوسلارآراسی انسان حاقلارینین ده یریندن و آزادلیق و قادینلارین برابرلییندن مدافعه ائئتمک، چئشیدلی مذهبلره و یا هئچ بیر مذهبه اینانمییان شخصلرین، امک بیریلیی نتیجه سینده، فرد و یا توپلومونون غلبه یوللارینی هامارلییاجاق.
۳. اورتویا سورولن”برابرلیک” ایسته گینن ” آزادلیق” ایستگی نین دویونلنمسینین و قادینلار حرکتینین باشقا دئموکراتیک و حق ایستیین حرکتلرنن داها آرتیق متحد اولماسینا شرایط یاراتما یولوندا چالیشما.
۴. قادینلارین قوللوغو علامتی اولان و جنسی سئچگینلیگین دوام ابزاری ساییلان، “حجاب” مجبوریتینه قارشی مبارزه یه بیرگه اینانج.
۵. بونا باخاراق کی، باسقینین آرتماسی، قادینلار حرکتینی دایاندیرا بیلر، بیز اؤلکه دیشیندا دئیی (بیان) آزادلیغیندان فایدالاناراق، تنقیدده شرکت ائتمه و اؤز استقلالیمیزی قوروما یا رغمن ایرانداکی فئمینستی مبارزیه آرخا دورماق اوچون گرکسل بیر رول ایفا ائدک.
بو اورتاق حداقل لره باخاراق و اولاری گؤزلویرک، بیز بو شبکه نین اویه لری (عضو)، شمالی آمئریکا و اوروپا شهرلرینده، ایران قادینلارینین حرکتینه چالیشقانلیقلا آرخادورماق اوچون چئشیدلی ایشلرین طرحی و اجراسینا ال ووراجاییق. بیز، بئله بیر باخیشدا، اؤزلرین بیزله اورتاق بیلن و بئله بیر چتین دورومدا بو آرخا دوروجو عملین گرک اولدوغونا اینانان قادینلاری صمیمیتله بو حرکته قوشولماغا چاغیریریق.
اولوسلار آراسی ایران قادینلارینین مبارزه سیله بیرلیک بیر شبکه سی
چاغیرانلار:
١- پروین ابراهیم زاده – آلمان ٢- نگار آزموده – کانادا ٣- لیلا اصلانی – آلمان ۴- سیمین افشار – آلمان ۵- الهه امانی – آمریکا ۶- ایراندخت انصاری – فرانسه ٧- فریماه ایجادی – فرانسه ٨- شعله ایرانی – سوئد ٩- آنا آسیه پاک – فرانسه ١٠- مهشید پگاهی سینا – آلمان ١١- کتایون پیرداوری – آلمان ١٢- پروین ثقفی – آلمان ١٣- میهن جزنی – فرانسه ١۴- عاطفه جعفری – آلمان ١۵- گلرخ جهانگیری – آلمان ١۶- قدسی حجازی- آلمان ١٧- مهوش دالائی – آلمان ١٨- فریبا داوودی مهاجر- آمریکا ١٩- هایده درآگاهی – سوئد ٢٠- یاسمن درویش – اطریش ٢١- مهشید راستی – سوئد ٢٢- میهن روستا – آلمان ٢٣- پروانه زرگر- آلمان ٢۴- پروانه سپهر- انگلستان ٢۵- سعیده سعادت – آلمان ٢۶- گیتی سلامی – آلمان ٢٧- فرح شریفی – آلمان ٢٨- شهلا شفیق – فرانسه ٢٩- نسرین صادقی – آلمان ٣٠- الهه صدر- آلمان ٣١- ژاله طالب حریری – آلمان ٣٢- شهلا عبقری – آمریکا ٣٣- گیتی عدالتی – آلمان ٣۴- مریم عظیمی – آلمان ٣۵- شهلا فیضی – آلمان ٣۶- منیره کاظمی – آلمان ٣٧- شکوفه کاوانی – استرالیا ٣٨- فاطمه کبیری – آلمان ٣٩- نرگس کرمانشاهی – کانادا ۴٠- سیما محضری – آلمان ۴١- هما مرادی- آلمان ۴٢- میلا مسافر – آلمان ۴٣- اکرم موسوی – آلمان ۴۴- سهیلا میرزایی – آلمان ۴۵- ناهید نصرت – آلمان ۴۶- مریم نوری – آلمان ۴٧- حمیلا نیسگیلی – آلمان